Sanchar Saathi Portal : మీ మొబైల్ ఫోన్ను ఎవరైనా దొంగిలించారా..? లేదంటే అనుకోకుండా మీ ఫోన్ పోయిందా..? లేదా సెకండ్ హ్యాండ్ ఫోన్ కొనేటప్పుడు అది జెన్యూనో కాదో తెలుసుకోవాలనుందా..? అయితే.. మీకు తోడుగా 'సంచార్ సాథీ' (Sanchar Saathi) నిలుస్తుంది. కేంద్ర ప్రభుత్వం తీసుకొచ్చిన ఈ పోర్టల్ దేశంలో మీ మొబైల్ ఫోన్ ఎక్కడ ఉన్నా.. ఎవరి దగ్గర ఉన్నా.. తక్కవ వ్యవధిలోనే మీ వద్దకు చేరే అవకాశాన్ని కల్పిస్తుంది. ఎలాగంటే..
Track My Lost Phone : ఇటీవల సంచార్ సాథీ వెబ్‍సైట్‍ను భారత ప్రభుత్వం దేశవ్యాప్తంగా అందుబాటులోకి తెచ్చింది. టెలికాం శాఖ పరిధిలోని టెక్నాలజీ విభాగం సీ-డాట్ (C-DoT) ఈ వెబ్‍సైట్‍ను రూపొందించింది. మొబైల్ ఫోన్ల అపహరణ.. పోగొట్టుకోవడం వంటి సమస్యలకు చెక్ పెట్టేందుకు ఇప్పటికే ఎన్నో యాప్స్, పోర్టల్స్ వంటివి అందుబాటులో ఉన్నా.. ఫలితాలు మాత్రం ఆశించిన స్థాయిలో ఉండటం లేదు. ఈ క్రమంలో పోగొట్టుకున్న మొబైల్స్ను తిరిగి సంపాదించుకునేందుకు వీలుగా కేంద్ర ప్రభుత్వం ఈ నయా పోర్టల్ (Sanchar Saathi website)ను దేశవ్యాప్తంగా అందుబాటులోకి తెచ్చింది. ఇటీవల ఢిల్లీలో జరిగిన ఓ కార్యక్రమంలో కేంద్ర టెలికాం మంత్రి అశ్విని వైష్ణవ్ ఈ పోర్టల్ను ప్రారంభించారు.
How To Track Lost Mobile Phone :
మొబైల్ పోగొట్టుకుంటే.. ఈ సంచార్ సాథీ వెబ్సైట్ (https://sancharsaathi.gov.in/)లో దాన్ని బ్లాక్ చేయవచ్చు. ట్రేస్ చేసేలా చేయవచ్చు. అలాగే.. సెకండ్ హ్యాండ్/పాత మొబైల్ ఫోన్ కొనే ముందు ఐఎంఈఐ సాయంతో ఆ ఫోన్.. జెన్యూన్‌దేనా లేదా దొంగిలించిందా అని చెక్ చేయచ్చు. ఆ ఫోన్ బ్రాండ్, మోడల్ నంబర్‌ను నిర్ధారించుకోవచ్చు. కొత్త మొబైల్ కొనే ముందు కూడా ఐఎంఈఐ (IMEI) నంబర్ సాయంతో ఆ మొబైల్ జెన్యూనిటీని తనిఖీ చేయవచ్చు. ముఖ్యంగా పాత ఫోన్ కొనుగోలు చేసే ముందు ఇది బాగా ఉపయోగపడుతుంది.
IMEI నంబర్ ఎలా తెలుసుకోవాలంటే..?
మొబైల్ IMEI నంబర్‌ను తెలుకోవాలంటే ఫోన్‍లో *#06# నంబర్‌కు డయల్ చేయాలి. ఆ తర్వాత ఐఎంఈఐ నంబర్ కనిపిస్తుంది. అలాగే ఫోన్ బిల్, ఇన్‍వాయిస్‍పై కూడా ఐఎంఈఐ నంబర్ ఉంటుంది. ఫోన్ బాక్సుపై కూడా ఐఎంఈఐ నంబర్ ఉంటుంది.
IMEI నంబర్‌తో ఫోన్ జెన్యూనిటీని ఇలా చెక్ చేయాలి
- మొదట సంచార్ సాథీ వెబ్సైట్ https://sancharsaathi.gov.in/ ఓపెన్‌ చేయాలి.
- హోమ్ పేజీలో సిటిజన్ సెంట్రిక్ సర్వీసెస్ (Citizen Centric Services) సెక్షన్‍లో బ్లాక్ యువర్ లాస్/స్టోలెన్ మొబైల్ (Block Your Lost/Stolen Mobile) అనే ఆప్షన్ కనిపిస్తుంది. ఆ ఆప్షన్‍పై క్లిక్ చేయాలి.
- తర్వాత కిందికి స్క్రోల్ చేస్తే.. నో యువర్ మొబైల్ (Know your Mobile) అనే సెక్షన్ కనిపిస్తుంది.
- దాని కింద వెబ్‍పోర్టల్ (Webportal) అనే ఆప్షన్ కింద క్లిక్ హియర్ (Click Here) అని ఉంటుంది. దానిపై క్లిక్ చేయాలి.
- ఆ తర్వాత మీ మొబైల్ నంబర్ ఎంటర్ చేయండి. అనంతరం ఓటీపీ ఎంటర్ చేయండి.
- అనంతరం మీరు ఏ మొబైల్ గురించి చెక్ చేయాలనుకుంటున్నారో ఆ ఫోన్ ఐఎంఈఐ (IMEI) నంబర్ ఎంటర్ చేసి చెక్ అనే బటన్‍పై క్లిక్ చేయాలి.
- ఆ మొబైల్ జెన్యూన్ అయితే.. ఐఎంఈఐ ఈజ్ వ్యాలిడ్ (IMEI is Valid) అని చూపిస్తుంది. ఇలా ఉంటే ఫోన్ కొనుగోలు చేయవచ్చు.
- బ్లాక్ లిస్టెడ్, డూప్లికేట్, ఆల్ రెడీ ఇన్ యూజ్ లాంటివి స్టేటస్‍లో చూపిస్తే ఆ ఫోన్ జెన్యూన్ కాదు.
